Кочкор суусу, Кочкор району

Кочкор суусу, Кочкор району – Чүй дарыясынын сол курамы. Кочкор районунда. Узундугу 45 км, алабынын аянты 2590 км². Чыгыш Каракол менен Сөөк сууларынын кошулушунан түзүлөт. Көк-Жар кыштагына жакын Жоон-Арык (Кара-Кужур) суусу менен кошулат. Ортоңку жана төмөнкү жагында саздуу кенен Кочкор өрөөнү аркылуу агып, нугунун туурасы 20–30 мге жетип, салааларга бөлүнүп кетет. Көп жылдык орточо чыгымы 12,6 м³/сек, эң көбү 32,6 м³/сек (август), эң азы 6,9 м³/сек (декабрь). Октябрда тартылып, май айында кире баштайт. Ири куймалары: Чыгыш Каракол, Сөөк, Кызарт, Мыкан, Шамшы ж. б. Сугатка пайдаланылат. Жээгинде Мантыш, Кызыл-Дөбө, Кум-Дөбө, Чолпон, Кочкор ж. б. кыштактар жайгашкан.

Колдонулган адабияттар

• “Кыргызстан” улуттук энциклопедиясы: 4-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2012. 832 бет, илл. ISBN 978 9967-14-104-9