Гөтеборг, Йөтеборг (швед.Göteborg(маалымат)/jœte'bɔrj/) — Швециянын түштүкбатышындагы шаар. Гөта-Эльв дарыясы Каттегат кысыгына куйган жерде жайгашкан порт (жылына 25 млн т жүк ташылат). Гөтеборг-Бохус ленинин (административдик-аймактык бирдик) административдик борбору. Калкы 454 миң (1997; шаар айланасы менен 700 миңден ашык). Өлкөдөгү чоңдугу боюнча 2-шаар. Швециянын Батыш Европага жана Атлантика океанына чыккан деңиз дарбазасы. Кеме, автомобиль куруу, подшипниктер, нефть ажыратуу, нефть-химиялык өнөр-жай ишканалары иштейт. Университет, чоң театр (1859), деңиз, сүрөт, археологиялык, этнография, тарых музейлери бар. 17-кылымдын башында негизделген. Собор (классицизм стилиндеги, 1802-15), форттор, ратуша (17-19-к.), Ост-Индия компаниясынын имараты (1740-жылдар чен) сакталган.
“Кыргызстан” улуттук энциклопедиясы: 2-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2007. 808 бет, илл. ISBN 978 9967-14-055 -4
